മോദി പാലക്കാടെത്തി; ആവേശമായി റോഡ് ഷോ
പാലക്കാട്: തിരഞ്ഞെടുപ്പ് പ്രഖ്യാപനത്തിന് പിന്നാലെ സംസ്ഥാനത്തെത്തിയ പ്രധാനമന്ത്രി നരേന്ദ്രമോദിയുടെ ആദ്യ റോഡ് ഷോ പാലക്കാട്. മേഴ്സി കോളേജ് ഗ്രൗണ്ടിലെ ഹെലിപാഡിൽ വന്നിറങ്ങിയ പ്രധാനമന്ത്രി നരേന്ദ്രമോദി റോഡ് ഷോ നടത്തി കോട്ടമൈതാനത്തെത്തി. അഞ്ചുവിളക്ക് പരിസരത്തുനിന്നാണ് റോഡ് ഷോ തുടങ്ങിയത്. കോട്ടമൈതാനത്തെ അഞ്ചുവിളക്ക് മുതൽ ഹെഡ് പോസ്റ്റ് ഓഫീസ് പരിസരം വരെയായിരുന്നു പ്രധാനമന്ത്രിയുടെ റോഡ് ഷോ.
റോഡ് ഷോയിൽ 50,000 പേരെ അണിനിരത്താനായിരുന്നു ബിജെപി ജില്ലാ നേതൃത്വം തീരുമാനമെടുത്തത്. വൻ ജനാവലിയാണ് മോദിയെ പുഷ്പവൃഷ്ടി നടത്തി സ്വീകരിച്ചത്. പാലക്കാട്, പൊന്നാനി ലോക്സഭാ മണ്ഡലങ്ങളിലെ സ്ഥാനാർത്ഥികളും ബിജെപി സംസ്ഥാന അധ്യക്ഷൻ കെ സുരേന്ദ്രനും മോദിക്കൊപ്പം തുറന്ന ജീപ്പിലുണ്ടായിരുന്നു.
അതേസമയം, മലപ്പുറത്തെ എൻഡിഎ സ്ഥാനാർത്ഥിയായ അബ്ദുൾ സലാമിന് മോദിയുടെ വാഹനത്തിൽ ഇടം കിട്ടിയില്ല. പട്ടികയിൽ പേരില്ലാത്തതിനെത്തുടർന്ന് അദ്ദേഹം പരിഭവിച്ച് മടങ്ങി. പട്ടികയിൽ പേരുണ്ടെന്നാണ് നേരത്തെ പറഞ്ഞിരുന്നത്. എന്നാൽ, എസ്പി ജി ലിസ്റ്റിൽ പേരില്ല എന്നറിഞ്ഞത് പ്രധാനമന്ത്രി വന്ന ശേഷമാണ്.
