ബിജെപിയില് അഴിച്ചുപണി: കെ സുരേന്ദ്രൻ ദേശീയ സെക്രട്ടറി
ന്യൂഡൽഹി: നിയമസഭാ തിരഞ്ഞെടുപ്പുകൾ മുന്നിൽക്കണ്ട് ബിജെപി ദേശീയ നേതൃത്വത്തിൽ വൻ പുനഃസംഘടന. ദേശീയ അധ്യക്ഷൻ നിതിൻ നബിന്റെ കീഴിലുള്ള പുതിയ ദേശീയ ഭാരവാഹിപ്പട്ടിക ബിജെപി പ്രഖ്യാപിച്ചു. മുൻ കേരള അധ്യക്ഷൻ കെ. സുരേന്ദ്രനെ ബിജെപി ദേശീയ സെക്രട്ടറിയായി നിയമിച്ചപ്പോൾ, അനിൽ ആന്റണി ദേശീയ സെക്രട്ടറി സ്ഥാനത്ത് തുടരും. അതേസമയം, ദേശീയ വൈസ് പ്രസിഡന്റ് സ്ഥാനത്തുനിന്ന് എ.പി. അബ്ദുള്ളക്കുട്ടിയെ ഒഴിവാക്കി. ബിഎൽ സന്തോഷിനെ ദേശീയ സംഘടനാ ജനറൽ സെക്രട്ടറിയായി പാർട്ടി നിലനിർത്തി. ശിവപ്രകാശ്, സൗദാൻ സിംഗ് എന്നിവരെ ദേശീയ ജോയിന്റ് ജനറൽ സെക്രട്ടറിമാരായും നിയമിച്ചു.
മുൻ കേന്ദ്രമന്ത്രി സ്മൃതി ഇറാനിയും രാജസ്ഥാൻ മുൻ മുഖ്യമന്ത്രി വസുന്ധര രാജയും ദേശീയ നേതൃത്വത്തിലേക്ക് ശക്തമായ തിരിച്ചുവരവ് നടത്തിയതാണ് പുനഃസംഘടനയിലെ പ്രധാന ആകർഷണം. സ്മൃതി ഇറാനിയെ പാർട്ടിയുടെ എട്ട് ദേശീയ ജനറൽ സെക്രട്ടറിമാരിൽ ഒരാളായി നിയമിച്ചപ്പോൾ, മുതിർന്ന നേതാവ് രാം മാധവിനെ ദേശീയ വൈസ് പ്രസിഡന്റാക്കി. ത്രിപുര മുൻ മുഖ്യമന്ത്രി ബിപ്ലബ് ദേബാണ് മറ്റൊരു പുതിയ ദേശീയ ജനറൽ സെക്രട്ടറി. കേന്ദ്രമന്ത്രി പിയൂഷ് ഗോയലിനെ വീണ്ടും ദേശീയ ട്രഷററായി നിയമിച്ചുയ 2010 മുതൽ 2014 വരെ അദ്ദേഹം ഈ പദവി വഹിച്ചിരുന്നു. അനിൽ ബലൂനി മീഡിയ ഇൻ-ചാർജ് സ്ഥാനത്ത് തുടരും.
