വേനൽ മഴ ആശ്വാസമെങ്കിലും;ചൂടിന് ശമനമില്ല,10 ജില്ലകളിൽ യെല്ലോ അലേർട്ട് തുടരുന്നു
തിരുവനന്തപുരം: സംസ്ഥാനത്ത് വേനൽ മഴ ചെറിയ ആശ്വാസമേകിയെങ്കിലും വിവിധ ജില്ലകളിൽ ഇപ്പോഴും കൊടും ചൂട് തുടരുകയാണ്. കാലാവസ്ഥ വകുപ്പ് ഏറ്റവും അവസാനമായി നൽകിയ മുന്നറിയിപ്പ് പ്രകാരം 5 ദിവസം വിവിധ ജില്ലകളിൽ കൊടും ചൂടനുഭവപ്പെടും. കേരളത്തിൽ നാല് ജില്ലകളിൽ മാത്രമാണ് നേരിയ ആശ്വാസമുള്ളത്. തിരുവനന്തപുരം, ഇടുക്കി, വയനാട്, കാസർകോട് ജില്ലകളിൽ ചൂടിന് നേരിയ ആശ്വാസമുള്ളത്. നിലവിൽ ഈ 4 ജില്ലകളിൽ മാത്രമാണ് താപനില മുന്നറിയിപ്പിൽ മഞ്ഞ അലർട്ട് പ്രഖ്യാപിച്ചിട്ടില്ലാത്തത്.
കാലാവസ്ഥ വകുപ്പ് നൽകുന്ന മുന്നറിയിപ്പ് പ്രകാരം ഈ മാസം 24 വരെ സംസ്ഥാനത്ത് ഈ 10 ജില്ലകളിലും കൊടും ചൂട് തുടരുമെന്നാണ് വ്യക്തമാകുന്നത്. കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, തൃശൂർ, മലപ്പുറം, പാലക്കാട്, കോഴിക്കോട്, കണ്ണൂർ ജില്ലകളിലാണ് 5 ദിവസം യെല്ലോ അലർട്ട് പ്രഖ്യാപിച്ചിട്ടുണ്ട്.ഈ ജില്ലകളിൽ മലയോര മേഖലകളിലൊഴികെ ചൂടിനൊപ്പം ഈർപ്പവുമുള്ള കാലാവസ്ഥയ്ക്കും സാധ്യതയുണ്ടെന്നാണ് കാലാവസ്ഥ കേന്ദ്രം നൽകുന്ന മുന്നറിയിപ്പ്.
