പത്മജയ്ക്കും അനിലിനും പാർട്ടി മാറിയതിൽ തെറ്റുകാണുന്നില്ല; ചാണ്ടി ഉമ്മന്‍
മുംബൈ: പത്മജ വേണുഗോപാലും അനില്‍ ആന്‍റണിയും ബിജെപിയില്‍ പോയതില്‍ പ്രതികരിച്ച് ചാണ്ടി ഉമ്മന്‍ എംഎല്‍എ. ഇരുവരും ബിജെപിയില്‍ പോയത് അവരുടെ തീരുമാനമാണെന്നും അതില്‍ തെറ്റുകാണുന്നില്ലെന്നും ചാണ്ടി ഉമ്മന്‍ പറഞ്ഞു. രാഹുല്‍ ഗാന്ധി നയിക്കുന്ന ഭാരത് ജോഡോ ന്യായ് യാത്രയുടെ ഭാഗമായി മുംബൈയില്‍ സംസാരിക്കുകയായിരുന്നു അദ്ദേഹം.
കോണ്‍ഗ്രസ് വിട്ടതിന് പിന്നാലെ പത്മജയ്ക്കെതിരെ പാര്‍ട്ടിയില്‍നിന്ന് ഉയര്‍ന്ന വിമര്‍ശനങ്ങള്‍ കരുണാകരന്‍റെ നിലവാരത്തിലേക്ക് പത്മജ എത്തിയില്ലെന്ന നിരാശ കൊണ്ടാണ്. രാഹുല്‍ മാങ്കൂട്ടത്തില്‍ നടത്തിയ പ്രസ്താവനകളോട് പ്രതികരിക്കാനില്ല. അത്തരത്തിലുള്ള മോശം പ്രസ്താവന താന്‍ ഒരിക്കലും നടത്തില്ലെന്നും ചാണ്ടി ഉമ്മന്‍ വക്തമാക്കി.
അതേസമയം, രാഹുല്‍ ഗാന്ധി നയിക്കുന്ന ഭാരത് ജോഡോ ന്യായ് യാത്രയുടെ പര്യടനം ഇന്ന് മുംബൈയില്‍ സമാപിക്കും.നാളെ മുംബൈ ദാദറിലെ ശിവാജി പാര്‍ക്കില്‍ ന്യായ് യാത്രയുടെ സമാപന സമ്മേളനവും മെഗാ റാലിയും നടക്കും. താനെയിലെ ഭീവണ്ടിയില്‍ നിന്ന് രാവിലെ ആരംഭിക്കുന്ന പര്യടനം വൈകീട്ടോടെ ദാദറിലെ അംബേദ്കര്‍ സ്മാരകത്തില്‍ സമാപിക്കും.
മണിപ്പൂരില്‍നിന്ന് ജനുവരി 14 ആരംഭിച്ച യാത്ര 15 സംസ്ഥാനങ്ങളിലൂടെയാണ് കടന്നുപോയത്. 63 ദിവസത്തെ യാത്രയില്‍ രാഹുലും സംഘവും 6700 കിലോമീറ്ററോളം സഞ്ചരിച്ചു. ഇന്ന് സംഘടന ജനറല്‍ സെക്രട്ടറി കെസി വേണുഗോപാല്‍, രമേശ് ചെന്നിത്തല എന്നിവര്‍ ജാഥയുടെ ഭാഗമാകും.
