വ്യാജ പരാതി: യുവാവിനെതിരെ കേസെടുത്ത് പോലീസ്

കണ്ണൂർ: ഇരിക്കൂർ സ്വദേശിക്കെതിരെ വഞ്ചന നടത്തിയെന്ന് കള്ളപ്പരാതി നല്‍കി ജയിലില്‍ അടക്കാൻ ശ്രമിച്ചതിന് പരാതിക്കാരനെതിരെ കണ്ണൂർ ടൗണ്‍ പൊലിസ് കേസെടുത്തു. കണ്ണൂർ ധനലക്ഷ്മി ആശുപത്രി റോഡിലെ ഹയാത്ത് വീട്ടില്‍ മുർഫാദ് മുസ്തഫ മൂസയുടെ പേരിലാണ്  കേസെടുത്തത്.

2024 മെയ്-13 ന് ടൗണ്‍ പോലീസ് സ്‌റ്റേഷനില്‍ നല്‍കിയ പരാതി വ്യാജമാണെന്ന് അന്വേഷണത്തില്‍ തെളിഞ്ഞതിനെ തുടർന്നാണ് പ്രതിയാക്കപ്പെട്ട ഇരിക്കൂർ കൊളപ്പ സ്വദേശിയായ ഷംസുദ്ദീൻ (45) പരാതിക്കാരനെതിരെ കേസെടുക്കണമെന്നാവശ്യപ്പെട്ട് പരാതി നല്‍കിയത്. 520/2024 നമ്പറായി ടൗണ്‍ പോലീസില്‍ രജിസ്റ്റർ ചെയ്യപ്പെട്ടതാണ് കേസ്. ഷംസുദ്ദീനെ അഞ്ചാം പ്രതിയാക്കിയാണ് പോലീസ് കേസെടുത്തത്.എന്നാല്‍ പോലീസിന്റെ അന്വേഷണത്തില്‍ മുർഫാദ് മുസ്തഫ മൂസ പോലീസിനെയും നിയമ സംവിധാനത്തേയും മന:പൂർവ്വം കബളിപ്പിക്കാൻ ശ്രമിച്ചതായും പരാതി വ്യാജമാണെന്ന് വ്യക്തമാകുകയും ചെയ്തിരുന്നു.ഇതേ തുടർന്നാണ് ഷംസുദ്ദീൻ കണ്ണൂർ സിറ്റി പോലീസ് കമ്മീഷണർക്ക് പരാതി നല്‍കിയത്. തുടർ നടപടി എന്ന നിലയിലാണ് പോലീസ് കേസെടുത്തത്.