മെസി തന്നെ നായകന്‍; അർജന്റീന കോപ്പ ടീമിനെ പ്രഖ്യാപിച്ചു
ഈ വർഷം നടക്കാനിരിക്കുന്ന കോപ്പ അമേരിക്ക ടൂര്‍ണമെന്റിനുള്ള അര്ജന്റീനയുടെ പ്രാഥമിക പട്ടിക പുറത്തുവിട്ടു. കോപയിലെ നിലവിലെ ചാമ്പ്യന്മാർ കൂടിയായ അര്‍ജന്‍റീന 29 അംഗ ടീമിനെയാണ് പ്രഖ്യാപിച്ചത്.
നായകന്‍ ലിയോണല്‍ മെസിക്കൊപ്പം ലോകകപ്പ് ടീമിലുണ്ടായിരുന്ന ഭൂരിഭാഗം താരങ്ങളും കോപ അമേരിക്ക സ്ക്വാഡിലുമുണ്ട്. എന്നാൽ മുതിർന്ന താരം പൗളോ ഡിബാലയ്‌ക്ക് ടീമിൽ ഇടം നേടാനായില്ല. കോപ്പയ്‌ക്ക് മുന്നോടിയായി നടക്കുന്ന രണ്ട് സൗഹൃദ മത്സരങ്ങളിലേക്കുള്ള ടീമിനെ കൂടിയാണ് പ്രഖ്യാപിച്ചത്.
ജൂണ്‍ ഒന്‍പതിന് എക്വഡോറുമായും 12-ന് ഗ്വാട്ടിമലയുമായാണ് അര്ജന്റീനയുടെ സൗഹൃദമത്സരം. ഇതിലെ പ്രകടനത്തിന്റെ അടിസ്ഥാനത്തില്‍ അന്തിമ പട്ടിക പുറത്തിറക്കും. വ്യക്തിഗത മികവും പരിക്കുമെല്ലാം കണക്കിലെടുത്ത ശേഷം 26 അംഗങ്ങളെ നിലനിര്‍ത്തി മൂന്നുപേരെ തഴയും. ‘
ജൂൺ 20നാണ് കോപ്പ അമേരിക്ക ടൂർണമെന്‍റ് തുടങ്ങുന്നത്. ആദ്യ മത്സരത്തിൽ കാനഡയാണ് അർജന്‍റീനയുടെ എതിരാളികള്‍. കാനഡക്ക് പുറമെ പെറു, ചിലി ടീമുകളാണ് അര്ജന്റീനയുടെ ഗ്രൂപ്പിലുള്ളത്. കഴിഞ്ഞ കോപ അമേരിക്ക ഫൈനലില്‍ ബ്രസീലിനെ എതിരില്ലാത്ത ഒരു ഗോളിന് വീഴ്‌ത്തിയാണ് ലിയോണല്‍ മെസി ഫുട്ബോളിലെ ആദ്യ അന്താരാഷ്‌ട്ര കിരീടം നേടിയത്.
ഗോള്‍കീപ്പര്‍മാര്‍: എമിലിയാനോ മാര്‍ട്ടിനസ്, ഫ്രാങ്കോ അര്‍മാനി, നിമോ റൂളി.
പ്രതിരോധം:ഗോണ്‍സാലോ മോണ്ടിയല്‍, നുവേല്‍ മൊളീന, ലിയനാര്‍ഡോ ബലര്‍ഡി, ക്രിസ്റ്റിയന്‍ റൊമേറോ, ജര്‍മന്‍ പെസല്ല, ലൂക്കാസ് മാര്‍ട്ടിനസ് ക്വാര്‍ട്ട, നിക്കോളാസ് ഓട്ടമെന്‍ഡി, ലിസാന്‍ഡ്രോ മാര്‍ട്ടിനസ്, മാര്‍ക്കസ് അക്യൂന, നിക്കോളാസ് ടാഗ്ലിയാഫിക്കോ, വാലന്റിന്‍ ബാര്‍സോ.
മധ്യനിര: ഗയ്‌ഡോ റോഡ്രിഗസ്, ലിയാന്‍ഡ്രോ പെരഡസ്, അലക്‌സിസ് മക്അലിസ്റ്റര്‍, റോഡ്രിഗോ ഡി പോള്‍, എക്‌സീക്വിയല്‍ പലാസിയസ്, എന്‍സോ ഫെര്‍ണാണ്ടസ്, ജിവാന ലൊ സെല്‍സോ.
മുന്നേറ്റം: എയ്ഞ്ചല്‍ ഡി മരിയ, വാലന്റിന്‍ കര്‍ബനി, ലയണല്‍ മെസ്സി, എയ്ഞ്ചല്‍ കൊറിയ, അലജാന്‍ഡ്രോ ഗര്‍നാച്ചോ, നിക്കോളാസ് ഗോണ്‍സാലസ്, ലൗട്ടാറോ മാര്‍ട്ടിനസ്, ജൂലിയന്‍ അല്‍വാരസ്‌
