നാസിക് മലയാളി കൾച്ചറൽ അസോസിയേഷൻ ചാരിറ്റബിൾ ട്രസ്റ്റിന്റെ 39-ാം വാർഷികവും ഓണാഘോഷവും നടന്നു
മുംബൈ/നാസിക്: നാസിക് മലയാളി കൾച്ചറൽ അസോസിയേഷൻ (NMCA) ചാരിറ്റബിൾ ട്രസ്റ്റിന്റെ 39-ാം വാർഷികവും ഓണാഘോഷവും 2026 ഒക്ടോബർ 10 ശനിയാഴ്ച മൗലി ലോൺസിൽ പ്രൗഢഗംഭീരമായി നടന്നു. നാസിക്കിലെ മലയാളി സമൂഹത്തിന്റെ ഐക്യവും ഒത്തൊരുമയും സാംസ്കാരിക അഭിമാനവും വിളിച്ചോതിയ ആഘോഷം ജനപങ്കാളിത്തംകൊണ്ടും വൈവിധ്യമാർന്ന പരിപാടികൾകൊണ്ടും ശ്രദ്ധേയമായി. എൻ.എം.സി.എ.(NMCA) പ്രസിഡന്റ് ശ്രീ. ഗോകുലം ഗോപാലകൃഷ്ണ പിള്ളയുടെ അധ്യക്ഷതയിൽ നടന്ന ചടങ്ങ് സംഘടനയുടെ ചെയർമാനും പ്രമുഖ വ്യവസായിയുമായ ശ്രീ. ബി. എൻ. വേണുഗോപാൽ നിലവിളക്ക് കൊളുത്തി ഉദ്ഘാടനം ചെയ്തു. കേരള നിയമസഭാംഗം (MLA) ശ്രീ. ഉല്ലാസ് കോവൂർ വിശിഷ്ടാതിഥിയായി പങ്കെടുത്തു. അദ്ദേഹത്തിന്റെ പ്രചോദനാത്മകമായ പ്രസംഗം സദസ്സിന് ആവേശവും പുതിയ ചിന്തകൾക്ക് പ്രചോദനവും പകർന്നു.
ഉദ്ഘാടന പ്രസംഗത്തിൽ ശ്രീ. ബി. എൻ. വേണുഗോപാൽ പ്രവാസി മലയാളികളുടെ ഐക്യം, സാമൂഹിക ഉത്തരവാദിത്വം, സാംസ്കാരിക പൈതൃക സംരക്ഷണം എന്നിവയുടെ പ്രാധാന്യം ഊന്നിപ്പറഞ്ഞു. ജന്മനാടിന്റെ സംസ്കാരവും പാരമ്പര്യവും അടുത്ത തലമുറയിലേക്ക് കൈമാറുന്നതിനൊപ്പം തങ്ങൾ ജീവിക്കുന്ന നാടിന്റെ പുരോഗതിയിലും സജീവ പങ്കാളികളാകേണ്ടത് പ്രവാസി സമൂഹത്തിന്റെ ഉത്തരവാദിത്വമാണെന്ന് അദ്ദേഹം ഓർമിപ്പിച്ചു. പരസ്പര സഹകരണത്തിലൂടെയും കൂട്ടായ പ്രവർത്തനങ്ങളിലൂടെയും സമൂഹത്തിന്റെ വളർച്ചയ്ക്കും ക്ഷേമത്തിനും വലിയ സംഭാവനകൾ നൽകാൻ കഴിയുമെന്നും അദ്ദേഹം ചൂണ്ടിക്കാട്ടി.
റോട്ടറി ഇന്റർനാഷണൽ ഡിസ്ട്രിക്ട് 3030-ന്റെ ചരിത്രത്തിൽ സുവർണ അധ്യായം കുറിച്ച പ്രമുഖ സാമൂഹിക നേതാവും മുൻ ഡിസ്ട്രിക്ട് -3030 ഗവർണറുമായ (PDG) ശ്രീമതി ആശാ വേണുഗോപാൽ ചടങ്ങിൽ വിശിഷ്ടാതിഥിയായി പങ്കെടുത്തു. കേരള ഫോക്‌ലോർ അക്കാദമി സെക്രട്ടറി ശ്രീ. പ്രദീപ് കുമാർ, പൂനെയിലെ പ്രമുഖ സാമൂഹിക പ്രവർത്തകനും സേവനരംഗത്തെ സജീവ സാന്നിധ്യവുമായ ശ്രീ. പി. വി. ഭാസ്കരൻ എന്നിവർ ചടങ്ങിൽ വിശിഷ്ടാതിഥികളായി പങ്കെടുത്തു. അവരുടെ സാന്നിധ്യം ആഘോഷത്തിന് കൂടുതൽ പ്രൗഢിയും പ്രസക്തിയും നൽകി.
മഹാബലിയുടെ ഐതിഹ്യവും ഓണത്തിന്റെ സമത്വ-സാഹോദര്യ സന്ദേശവും വിളിച്ചോതിയ ആഘോഷത്തിൽ പരമ്പരാഗത അത്തപ്പൂക്കളം, വിവിധ മത്സരങ്ങൾ, വിദ്യാർഥികളുടെ കലാപരിപാടികൾ, സാംസ്കാരിക അവതരണങ്ങൾ, സംഗീതപരിപാടികൾ എന്നിവ അരങ്ങേറി. വിശിഷ്ട വ്യക്തികളെ ആദരിച്ച ചടങ്ങുകളും പരമ്പരാഗത ഓണസദ്യയും പരിപാടിയുടെ പ്രധാന ആകർഷണങ്ങളായി. ഓരോ വർഷവും സമൂഹത്തിന് വിലപ്പെട്ട സംഭാവനകൾ നൽകിയ ഒരു വിശിഷ്ട വ്യക്തിയെ ആദരിച്ചുവരുന്ന NMCAയുടെ പാരമ്പര്യത്തിന്റെ ഭാഗമായി, 2026-ലെ NMCA വിശിഷ്ട വ്യക്തി പുരസ്കാരം പൂനെയിലെ പ്രമുഖ സാമൂഹിക പ്രവർത്തകനായ ശ്രീ. പി. വി. ഭാസ്കരന് സമ്മാനിച്ചു. സാമൂഹിക സേവനരംഗത്തെ അദ്ദേഹത്തിന്റെ സംഭാവനകളെ ആദരിച്ചുകൊണ്ടുള്ള ഈ പുരസ്കാരം ചടങ്ങിന് പ്രത്യേക പ്രാധാന്യമേകി. പൂനെയിലെ ഡി കേരള കമ്പനിയുടെ ആവേശകരമായ ജാമിങ് പരിപാടി ആഘോഷത്തിന് കൂടുതൽ മാറ്റും മിഴിവും പകർന്നു.
ജനറൽ സെക്രട്ടറി ശ്രീ. അനൂപ് പുഷ്പാംഗതൻ തന്റെ ആശംസാപ്രസംഗത്തിൽ സംഘടനയുടെ വിവിധ സാമൂഹിക, വിദ്യാഭ്യാസ, ആരോഗ്യ, ജീവകാരുണ്യ പ്രവർത്തനങ്ങളെക്കുറിച്ച് വിശദീകരിച്ചു. പ്രവാസി മലയാളികളെ ഒരുമിപ്പിക്കുക, കേരളത്തിന്റെ സമ്പന്നമായ സംസ്കാരവും പാരമ്പര്യവും സംരക്ഷിക്കുക, സാമൂഹിക സൗഹാർദം വളർത്തുക, അർഹരായവർക്ക് ആവശ്യമായ സഹായങ്ങൾ ലഭ്യമാക്കുക എന്നിവയാണ് NMCA ചാരിറ്റബിൾ ട്രസ്റ്റിന്റെ പ്രധാന ലക്ഷ്യങ്ങളെന്ന് അദ്ദേഹം വ്യക്തമാക്കി.
അക്ഷര എജുക്കേഷണൽ അക്കാദമി എന്ന വിദ്യാഭ്യാസ സംരംഭത്തിലൂടെ കുട്ടികളുടെ പഠനത്തിനും വളർച്ചയ്ക്കും അവസരമൊരുക്കുന്നതിനൊപ്പം വിവിധ സാമൂഹിക-ജീവകാരുണ്യ പ്രവർത്തനങ്ങളിലൂടെ അർഹരായവരെ സഹായിക്കാനും സംഘടന മുന്നിട്ടിറങ്ങുന്നു. കുട്ടികൾക്ക് മികച്ച പഠനാന്തരീക്ഷം ഒരുക്കുകയും അവരുടെ കഴിവുകൾ വളർത്തുകയും ചെയ്യുക എന്ന ലക്ഷ്യത്തോടെ ട്രസ്റ്റ് പ്രവർത്തിച്ചുവരുന്നു. പ്രവാസി മലയാളികൾ നേരിടുന്ന യാത്രാസംബന്ധമായ പ്രശ്നങ്ങളിൽ ഇടപെടുക, ആവശ്യമായ സഹായങ്ങളും മാർഗനിർദേശങ്ങളും ലഭ്യമാക്കുക, യാത്രയ്ക്കിടയിലെ ബുദ്ധിമുട്ടുകൾ പരിഹരിക്കുന്നതിന് ബന്ധപ്പെട്ട അധികാരികളുമായി സഹകരിക്കുക എന്നിവയും ട്രസ്റ്റിന്റെ പ്രധാന പ്രവർത്തനമേഖലകളിൽ ഉൾപ്പെടുന്നു. ആരോഗ്യപരിരക്ഷ, ആയുർവേദ ചികിത്സാസഹായം, വിദ്യാഭ്യാസ പിന്തുണ, പ്രവാസി ക്ഷേമം തുടങ്ങിയ മേഖലകളിൽ കൂടുതൽ സജീവമായി ഇടപെട്ട് സമൂഹത്തിന് കരുതലും കൈത്താങ്ങും നൽകുകയാണ് സംഘടനയുടെ ലക്ഷ്യമെന്നും പ്രവാസി മലയാളികളുടെ തുടർന്നുള്ള സഹകരണവും പിന്തുണയും പ്രതീക്ഷിക്കുന്നതായും ജനറൽ സെക്രട്ടറി അറിയിച്ചു.
വിവിധ മേഖലകളിൽ മികവ് തെളിയിച്ച് നേട്ടങ്ങൾ കൈവരിച്ച വിദ്യാർഥികൾ, കലാകാരന്മാർ, സാമൂഹിക പ്രവർത്തകർ എന്നിവരെ ചടങ്ങിൽ മെമന്റോകളും ക്യാഷ് അവാർഡുകളും നൽകി ആദരിച്ചു. പ്രതിഭകളെ കണ്ടെത്തി പ്രോത്സാഹിപ്പിക്കുകയും അവരുടെ നേട്ടങ്ങളെ സമൂഹത്തിന് മുന്നിൽ അംഗീകരിക്കുകയും ചെയ്യുന്നത് പുതിയ തലമുറയ്ക്ക് കൂടുതൽ ഉയരങ്ങൾ കീഴടക്കാൻ പ്രചോദനമാകുമെന്ന സന്ദേശമാണ് ഈ ആദരിക്കൽ ചടങ്ങ് നൽകിയത്.
“ഒരുമയാണ് ശക്തി, സേവനമാണ് ലക്ഷ്യം, സംസ്കാരമാണ് നമ്മുടെ അഭിമാനം” എന്ന സന്ദേശം ഉയർത്തിപ്പിടിച്ച ഈ വാർഷികാഘോഷം ഐക്യത്തിന്റെയും സാഹോദര്യത്തിന്റെയും സാംസ്കാരിക അഭിമാനത്തിന്റെയും മനോഹരമായ സംഗമമായി മാറി.ചടങ്ങിൽ NMCA വനിതാ സമാജം സെക്രട്ടറി ഡോ. സ്മിത നായർ ഹൃദയപൂർവം നന്ദി രേഖപ്പെടുത്തി.
