വിൽപ്പനയ്ക്ക് എത്തിച്ച എം.ഡി.എം.എ യുമായി യുവാവ് പിടിയിൽ
കൊല്ലം : കരുനാഗപ്പള്ളിയിൽ വിൽപ്പനയ്ക്കായി എത്തിച്ച 14.702 ഗ്രാം എം.ഡി.എം.എ യുമായി യുവാവ് പോലീസ് പിടിയിലായി. കൊല്ലം കരുനാഗപ്പള്ളി തഴവ പൊയ്കയിൽ വീട്ടിൽ സുധീർ മകൻ അജ്മൽ ഷാ (22) എന്നയാളാണ് കരുനാഗപ്പള്ളി സബ്ബ് ഡിവിഷൻ ഡാൻസാഫ് ടീമിന്റെ പിടിയിലായത്. ബാംഗ്ലൂരിൽ നിന്ന് കരുനാഗപ്പള്ളിയിലും പരിസര പ്രദേശങ്ങളിലും വിൽപ്പനയ്ക്കായി എത്തിച്ച എം.ഡി.എം.എ ആണ് പിടികൂടിയത്. ഇയാൾ അന്യസംസ്ഥാനത്ത് നിന്ന് മയക്കുമരുന്ന് എത്തിക്കുന്നതായി ഡാൻസാഫ് സംഘത്തിന് രഹസ്യവിവരം ലഭിച്ചതിന്റെ അടിസ്ഥാനത്തിൽ 26.10.2025 തിയ്യതി വൈകിട്ട് 5.30 ന് കരുനാഗപ്പള്ളി തൊടിയൂർ വില്ലേജിൽ കസൂർമുക്ക് എന്ന സ്ഥലത്ത് വച്ച് നടത്തിയ പരിശോധനയിലാണ് ഇയാളുടെ പക്കൽ നിന്നും എം.ഡി.എം.എ കണ്ടെടുത്തത്. എസ്.ഐ കണ്ണന്റെ നേതൃത്വത്തിലുള്ള ഡാൻസാഫ് സംഘവും കരുനാഗപ്പള്ളി പോലീസും ചേർന്നാണ് പ്രതിയെ പിടികൂടിയത്.
