ഓച്ചിറ കാളകെട്ടുകളിലെ കാളത്തലകൾ നിർമ്മിച്ചിരുന്നവരിൽ പ്രധാനിയായിരുന്നു ചുനക്കര രാജൻ
കേരളത്തിലെ ഒരു കലാകാരനായിരുന്നു ചുനക്കര രാജൻ. ഓണാട്ടു കരയിലെ കാളകെട്ടുകളിലെ കാളത്തലകൾ നിർമ്മിച്ചിരുന്നവരിൽ പ്രധാനിയായിരുന്നു അദ്ദേഹം. 2005-ലെ മികച്ച കലാ സംവിധായകനുള്ള ദേശീയ പുരസ്കാരവും ഇദ്ദേഹത്തിനു ലഭിച്ചിട്ടുണ്ട്. പേരുകേട്ട കൂറ്റൻ കാളത്തലകളുടെ ശില്പി എന്ന നിലയിൽ ഗിന്നസ് ബുക്കിലും അദ്ദേഹം ഉൾപ്പെടുത്തപ്പെട്ടിട്ടുണ്ട്. ചുമർച്ചിത്രരചനയും ശില്പനിർമ്മാണത്തിലും ക്ഷേത്ര നിർമ്മാണത്തിലും അദ്ദേഹം നിപുണനായിരുന്നു. 1955 നവംബർ 1നു മാവേലിക്കര ചുനക്കരയിൽ കൊച്ചുരാമൻ-നാരായണി ദമ്പതികളുടെ മകനായി ജനിച്ചു. 2014 ജൂൺ 3 നു കലാ ലോകത്തുനിന്നും വിടപറഞ്ഞു. ഭാര്യ കെ.കെ. തങ്കമണി, മക്കൾ താര, വിഷ്ണു
1980 ഇന്റർ നാഷണൽ ബുക്ക്‌പ്രോജക്ട് അവാർഡ് (അമേരിക്ക), 1993-ലെ ചിത്രകലയ്ക്കുളള സ്വർണ്ണ കമലം, കേരളാലളിതകലാഅക്കാദമി, 1994-ലെ ശിൽപ്പകലയ്ക്കുളള ദേശീയ അവാർഡ്, കേന്ദ്രകരകൗശല വികസന കോർപറേഷൻ, 1995-ലെ കെ. രാമനുണ്ണിത്താൻ അവാർഡ്, 1996-ലെ ചിത്ര-ശിൽപ കലക്കുള്ള ഫെലോഷിപ്പ്, ഗാന്ധി മ്യൂസിയം, ഇംഗ്ളണ്ട്, 1997-ലെ ഗ്രാമശ്രീ അവാർഡ്, 2005-ലെ തച്ചുശാസ്ത്രരത്‌ന ശിൽപ്പരത്‌ന അവാർഡ് കേരള സംസ്ഥാനസർക്കാർ, തുടങ്ങി നിരവധി പുരസ്കാരങ്ങൾ ലഭിച്ചിട്ടുണ്ട്. കൊടുമൺ ചിലന്തിക്ഷേത്രത്തിലെ ശക്തിഭദ്ര പ്രതിമയുടെ ശില്പഭംഗിയുടെ തികവിനാൽ അനാച്ഛാദനത്തിനെത്തിയ ഉത്രാടം തിരുനാൾ മാർത്താണ്ഡവർമ്മ ശിൽപ്പികലാനിധി പട്ടം നൽകി ആദരിച്ചിരുന്നു.
