യുഎസിന്‍റെ 47-ാമത് പ്രസിഡന്‍റായി ഡൊണാള്‍ഡ് ട്രംപ് ഇന്ന് അധികാരമേല്‍ക്കും.
വാഷിങ്‌ടണ്‍ : നാലാണ്ടുകള്‍ക്കു മുന്‍പ് ക്യാപിറ്റോളിന്‍റെ പടിയിറങ്ങിയ ട്രംപ് വീണ്ടും എത്തുകയാണ്, തന്‍റെ രണ്ടാം ഇന്നിങ്‌സിനായി. 1985ന് ശേഷം ആദ്യമായി ക്യാപിറ്റോള്‍ മന്ദിരത്തിനകത്തുവച്ച് നടക്കുന്ന സ്ഥാനാരോഹണ ചടങ്ങ്. ട്രംപിന്‍റെ രണ്ടാം വരവ് ആഘോഷമാക്കാന്‍ വാഷിങ്‌ടണും ഒരുങ്ങിക്കഴിഞ്ഞു.
47-ാമത് അമേരിക്കന്‍ പ്രസിഡന്‍റായാണ് ഡൊണാള്‍ഡ് ട്രംപ് ഇന്ന് അധികാരമേല്‍ക്കുന്നത്. ഇന്ത്യന്‍ സമയം രാത്രി 10.30ന് വാഷിങ്‌ടണ്‍ ഡിസിയിലെ ക്യാപിറ്റോള്‍ മന്ദിരത്തിലാണ് ട്രംപിന്‍റെ സ്ഥാനാരോഹണ ചടങ്ങുകള്‍ നടക്കുക. ചടങ്ങിലേക്ക് ക്ഷണിക്കപ്പെട്ട രാഷ്‌ട്ര തലവന്‍മാര്‍ അടക്കുള്ള അതിഥികള്‍ ഇതിനോടകം തന്നെ വാഷിങ്‌ടണില്‍ എത്തിയിട്ടുണ്ട്.അതിശൈത്യം കണക്കിലെടുത്താണ് സത്യപ്രതിജ്ഞ ചടങ്ങുകള്‍ ക്യാപിറ്റോള്‍ മന്ദിരത്തിന് ഉള്ളിലാക്കിയത്. ക്യാപിറ്റോളിലെ റോട്ടണ്‍ഡ ഹാളിലായിരിക്കും ചടങ്ങുകള്‍ നടക്കുക. സത്യപ്രതിജ്ഞയ്‌ക്ക് ശേഷമുള്ള പരേഡ് ക്യാപിറ്റോള്‍ വണ്‍ അറീനയില്‍ നടക്കും.
