വെടിക്കെട്ട് പുരയിലുണ്ടായ അപകടം: മജിസ്റ്റീരിയല് അന്വേഷണത്തിന് ഉത്തരവിട്ട് കലക്ടര്
തൃശ്ശൂര്: തൃശ്ശൂരിലെ വെടിക്കെട്ട് പുരയിലുണ്ടായ സ്ഫോടനത്തില് വിശദമായ മജിസ്റ്റീരിയല് അന്വേഷണത്തിന് ഉത്തരവിട്ട് ജില്ലാ കലക്ടര്. സബ് ഡിവിഷണല് മജിസ്ട്രേറ്റായ തൃശൂര് ആര്ഡിഒയ്ക്കാണ് അന്വേഷണത്തിന്റെ ചുമതല. അപകടത്തിന്റെ കാരണവും അതിന്റെ അനന്തരഫലങ്ങളും വിശദമായി അന്വേഷിക്കാന് നിര്ദ്ദേശിച്ചിട്ടുണ്ട്. അപകടത്തില് 14 മരണമാണ് ഇതുവരെ സ്ഥിരീകരിച്ചത്.
അപകടത്തില് പരിക്കേറ്റ 23 പേരെ മെഡിക്കല് കോളജ് ആശുപത്രിയില് പ്രവേശിപ്പിച്ചു. അപകടം നടന്ന സമയത്ത് ഏകദേശം 30-നും 40-നും ഇടയില് ആളുകള് സംഭവസ്ഥലത്തുണ്ടായിരുന്നുവെന്നാണ് ജില്ലാ കലക്ടര് ശിഖ സുരേന്ദ്രന് നല്കുന്ന വിവരം. ഇവരില് ചിലര് വെള്ളം കുടിക്കാനും മറ്റുമായി പ്രദേശത്ത് നിന്നും മാറിയിട്ടുണ്ടെന്നും വിവരമുണ്ട്. സ്ഫോടനത്തിന്റെ യഥാര്ത്ഥ കാരണം ഇതുവരെ വ്യക്തമായിട്ടില്ലെന്നും രക്ഷാപ്രവര്ത്തനം യുദ്ധകാലാടിസ്ഥാനത്തില് പുരോഗമിക്കുകയാണെന്നും കലക്ടര് വ്യക്തമാക്കി.
അപകടസ്ഥലത്ത് പൊലീസ്, ഫയര് ആന്ഡ് റെസ്ക്യൂ, ആരോഗ്യവകുപ്പ്, റവന്യൂ, ദുരന്തനിവാരണ വിഭാഗങ്ങള് എന്നിവയെ ഏകോപിപ്പിച്ചുകൊണ്ടാണ് നിലവില് പ്രവര്ത്തനങ്ങള് തുടരുന്നത്. അപകടത്തില് മരിച്ചവരുടെ വിയോഗത്തില് മുഖ്യമന്ത്രി അനുശോചനം രേഖപ്പെടുത്തി. വിവിധ വകുപ്പുകളുടെ ഏകോപനത്തിലൂടെ പരമാവധി വേഗത്തില് സഹായമെത്തിക്കാനാണ് സര്ക്കാര് ലക്ഷ്യമിടുന്നത്. തൃശ്ശൂര് മെഡിക്കല് കോളേജ് ആശുപത്രിയില് കണ്ട്രോള് റൂം തുറന്നിട്ടുണ്ട്, 8075011853
അപകടത്തില് പരിക്കേറ്റവര്ക്ക് എല്ലാവിധ ചികിത്സാ സഹായങ്ങളും ലഭ്യമാക്കാന് സര്ക്കാര് സംവിധാനങ്ങളെ സജ്ജമാക്കാന് മുഖ്യമന്ത്രി പിണറായി വിജയന് ചീഫ് സെക്രട്ടറിക്ക് നിര്ദ്ദേശം നല്കി. പൊള്ളലേറ്റവര്ക്ക് വിദഗ്ധ ചികിത്സ ഉറപ്പാക്കുന്നതിനായി ആവശ്യമെങ്കില് സംസ്ഥാനത്തിന് പുറത്തുള്ള വിദഗ്ധ ഡോക്ടര്മാരുടെ സേവനം തേടുമെന്നും മുഖ്യമന്ത്രി വ്യക്തമാക്കി.
