ആൺകുട്ടികള്‍ക്കും പഠിക്കാം; കേരള കലാമണ്ഡലത്തിലെ ആൺകുട്ടികളുടെ മോഹിനിയാട്ട പഠനം, നിര്‍ണായക തീരുമാനം ഇന്ന്
കേരള കലാമണ്ഡലത്തിൽ മോഹിനിയാട്ടം ഇനി ആൺകുട്ടികൾക്കും പഠിക്കാം.ഇത് സംബന്ധിച്ച നിർണായക തീരുമാനം ഇന്ന് ചേരുന്ന ഭരണസമിതി യോഗത്തിൽ തീരുമാനിച്ചേക്കും. കുട്ടികൾക്ക് എട്ടാം ക്ലാസുമുതൽ പിജി കോഴ്സ് വരെ മോഹിനിയാട്ടം പഠിക്കാനുള്ള അവസരം കലാമണ്ഡലത്തിലുണ്ട്.നൂറിലേറെ വിദ്യാർഥിനികൾ പത്തിലേറെ കളരികളിൽ ചുവടു വെയ്ക്കുന്നു.
മോഹിനിയാട്ടത്തിനു അധിക തസ്തിക സൃഷ്ടിക്കേണ്ടതില്ലാത്തതിനാൽ, ആൺകുട്ടികള്‍ക്ക് പഠിക്കുന്നതുമായി ബന്ധപ്പെട്ട് തീരുമാനമെടുക്കാൻ വേറെ തടസങ്ങൾ ഒന്നുമുണ്ടാകില്ല. തെരഞ്ഞെടുപ്പ് പെരുമാറ്റച്ചട്ടം തടസ്സമാകുന്ന സാഹചര്യമുണ്ടായാൽ മാത്രം തീരുമാനം തെരഞ്ഞെടുപ്പിന് ശേഷമെടുക്കാനാണ് ഇവര്‍ തീരുമാനിച്ചിരിക്കുന്നത്. വിദഗ്ധരടങ്ങുന്ന കമ്മിറ്റി ഇതിന്റെ കരിക്കുലം തീരുമാനിക്കും.
ജെൻട്രൽ ന്യൂട്രൽ അക്കാദമിയായി കലാമണ്ഡലം നിലനിർത്താനാണ് ആഗ്രഹം, അതിനാല്‍ ആൺകുട്ടികൾക്കും പ്രവേശനം അനുവദിക്കുമെന്നും വൈസ് ചാൻസിലർ അറിയിച്ചു. ജാതി, ലിംഗ അധിഷേപം ഏറ്റുവാങ്ങേണ്ടിവന്ന മോഹിനിയാട്ടം നർത്തകൻ ആര്‍എല്‍വി രാമകൃഷ്ണന് കൂത്തമ്പലത്തിൽ അവസരം ഒരുങ്ങിയതിന് തൊട്ടടുത്ത ദിവസം തന്നെയാണ് ഇങ്ങനെയൊരു ചരിത്ര തീരുമാനത്തിലേക്ക് കലാമണ്ഡലം എത്തുന്നത്.
