പോസ്റ്റ് ഓഫീസുകളിലും ഓഗസ്റ്റ് 1മുതൽ പണമിടപാട് ഇനി ഡിജിറ്റലാകും
ന്യൂഡല്‍ഹി: ഇന്ത്യയിലുടനീളമുള്ള പോസ്റ്റ് ഓഫീസുകളില്‍ ഇനി ഡിജിറ്റല്‍ പെയ്മെൻ്റ് സ്വീകരിക്കും. എല്ലാ പോസ്റ്റ് ഓഫീസുകളുടെയും ഐടി സിസ്‌റ്റത്തില്‍ ഇതിനായുള്ള പുതിയ ആപ്ലിക്കേഷന്‍ പുറത്തിറക്കും. ഇന്‍സ്‌റ്റാള്‍ നടപടികള്‍ പൂര്‍ത്തിയാക്കിയ ശേഷം ഓഗസ്റ്റ് മുതല്‍ കൗണ്ടറുകളില്‍ ഡിജിറ്റല്‍ പേയ്മെൻ്റ് തുടങ്ങുമെന്ന് ഔദ്യോഗിക വ്യത്തങ്ങള്‍ അറിയിച്ചു.
യുപിഐ (യുണീക്ക് പേയ്മെൻ്റ് ഇൻ്റര്‍ഫെസ്) സംവിധാനവുമായി അക്കൗണ്ടുകള്‍ സമന്വയിപിക്കാത്തതിനാല്‍ പോസ്റ്റ് ഓഫീസുകള്‍ക്ക് ഡിജിറ്റല്‍ പെയ്മെൻ്റ് സ്വീകരിക്കാന്‍ കഴിഞ്ഞിരുന്നില്ല. “ഡൈനാമിക് ക്യൂ ആര്‍ കോഡ് ഉപയോഗിച്ച് പണമിടപാടുകള്‍ നടത്താന്‍ പ്രാപ്‌തമാക്കുന്ന പുതിയ ആപ്ലിക്കേഷനുകള്‍ തപാല്‍ വകുപ്പിൻ്റെ ഐടി സിസ്‌റ്റത്തില്‍ ഉള്‍പ്പെടുത്തും. 2025 ഓഗസ്‌റ്റോടെ എല്ലാ തപാല്‍ ഓഫീസുകളിലും ഇത് വ്യാപിപ്പിക്കും”- ഔദ്യോഗിക വ്യത്തങ്ങള്‍ അറിയിച്ചു.
ഐ.ടി 2.0 പ്രകാരമുള്ള പുതിയ സംവിധാനത്തിന്‍റെ പരീക്ഷണം കര്‍ണാടകയിൽ നടക്കുന്നുണ്ട്. മൈസൂര്‍ ഹെഡ് ഓഫീസ്, ബാഗല്‍കോട്ട് ഹെഡ് ഓഫീസ് അതിൻ്റെ കീഴിലുള്ള ഓഫീസുകളിലേക്ക് മെയില്‍ ഉല്‍പ്പന്നളുടെ ക്യൂആര്‍ അധിഷ്‌ഠിത ബുക്കിങ് വിജയകരമായി നടത്തി.
തുടക്കത്തില്‍ ഡിജിറ്റല്‍ ഇടപാടുകള്‍ സാധ്യമാക്കുന്നതിനായി പോസ്റ്റ് ഓഫീസുകളിലെ ഓഫ് സെയില്‍ കൗണ്ടറുകളില്‍ സ്‌റ്റാറ്റിക് ക്യൂ ആര്‍ കോഡ് പോസ്റ്റ് വകുപ്പ് അവതരിപ്പിച്ചിരുന്നു. എന്നിരുന്നാലും ആവര്‍ത്തിച്ചുള്ള സാങ്കേതിക ബുദ്ധിമുട്ടുകളും ഉപഭോക്തൃ പരാതികളും കാരണം ഇത് നിര്‍ത്തലാക്കേണ്ടി വന്നു.
