കാപ്പാ നിയമപ്രകാരം കുപ്രസിദ്ധ ഗുണ്ടയെ കരുതൽ തടങ്കലിലാക്കി
ആലപ്പുഴ : കായംകുളത്ത് കാപ്പാ നിയമപ്രകാരം കുപ്രസിദ്ധ ഗുണ്ടയെ കരുതൽ തടങ്കലിലാക്കി. കായംകുളം വില്ലേജിൽ പെരിങ്ങാല മുറിയിൽ കുന്നേൽ വീട്ടിൽ ബോക്സർ എന്ന് വിളിക്കുന്ന അദിനാനെയാണ് (23) കാപ്പാ നിയമപ്രകാരം കരുതൽ തടങ്കലിൽ തിരുവനന്തപുരം സെൻട്രൽ ജയിലിലടച്ചത്. കുപ്രസിദ്ധ ഗുണ്ടയായ അദിനാൻ 11.09.2025 തീയതിയിൽ മേനാത്തേരിയിൽ വെച്ച് ചേരാവള്ളി സ്വദേശിയായ യുവാവിനെയും സുഹൃത്തിനേയും ഹോക്കി സ്റ്റിക്കും മറ്റും ഉപയോഗിച്ച് കഠിന ദേഹോപദ്രവം ഏൽപ്പിച്ചതിനാലാണ് ഇപ്പോൾ അദിനാനെതിരെ കാപ്പാ പ്രകാരം നടപടി സ്വീകരിച്ചത്. ഈ സംഭവത്തിന് ശേഷം ഒളിവിലായിരുന്നതിനാൽ ആലപ്പുഴ ജില്ലാ കളക്ടറുടെ കാപ്പാ നിയമ പ്രകാരം ഉള്ള ഉത്തരവിൻമേൽ തുടർ നടപടി സ്വീകരിക്കുന്നതിന്റെ ഭാഗമായി കായംകുളം ജ്യൂഡീഷ്യൽ ഒന്നാം ക്ലാസ്സ് മജിസ്ട്രേറ്റ് കോടതി അദിനാന്റെ മുൻ കേസിലെ ജാമ്യക്കാർക്ക് നോട്ടീസ് അയക്കുകയും, ആയതറിഞ്ഞ് അദിനാൻ കോടതിയിൽ കീഴടങ്ങുകയുമായിരുന്നു.
തുടർന്ന് കോടതി അദിനാനെ കാപ്പാ ഉത്തരവ് പ്രകാരം തിരുവനന്തപുരം സെൻട്രൽ ജയിലിലേക്ക് അയയ്ക്കുകയുമായിരുന്നു. 2024 ൽ മൂന്ന് കൊലപാതക ശ്രമ കേസുകളിൽ പ്രതിയായതിനെ തുടർന്ന് അദിനാനെ കാപ്പാ ചുമത്തി 2025 മാർച്ച് മാസം കരുതൽ തടങ്കലിലാക്കിയിരുന്നു. തുടർന്ന് കാപ്പാ അഡ്വൈസറി ബോർഡ് ഇളവ് നൽകി വിട്ടയച്ച അദിനാൻ വീണ്ടും ക്രിമിനൽ കേസിൽ പ്രതിയാകുകയായിരുന്നു. ഈ കേസുകൾ കൂടാതെ കായംകുളം പോലീസ് സ്റ്റേഷനിൽ നിരവധി അടിപിടി കേസുകളിലും പ്രതിയാണ് അദിനാൻ. ഇത്തരത്തിൽ കേസുകളിൽ തുടർച്ചയായി ഉൾപ്പെട്ടതിനെ തുടർന്ന് അലപ്പുഴ ജില്ലാ പോലീസ് മേധാവി നൽകിയ ശുപാർശ അംഗീകരിച്ചാണ് ആലപ്പുഴ ജില്ലാ മജിസ്ട്രേറ്റ് കൂടിയായ ആലപ്പുഴ ജില്ലാ കളക്ടർ അലക്സ് വർഗ്ഗീസ്. ഐ എ.എസ്. ബോക്സർ എന്നു വിളിക്കുന്ന അദിനാനെതിരെ ആറു മാസക്കാലത്തേക്ക് കരുതൽ തടങ്കൽ ഉത്തരവ് പുറപ്പെടുവിച്ചത്. വരും ദിവസങ്ങളിൽ കാപ്പാ നിയമപ്രകാരം സാമൂഹിക വിരുദ്ധർക്കെതിരെകൂടുതൽ ശക്തമായ നടപടികൾ ഉണ്ടാവുമെന്ന് കായംകുളം പോലീസ് അറിയിച്ചു.
