യുവതയ്ക്കും സംഗീതത്തിനും പുതുവേദി ഒരുക്കി, ബോംബെ കേരളീയസമാജം
മാട്ടുംഗ: സമാജ പ്രവർത്തനങ്ങളിൽ, യുവതലമുറയേയും അതോടൊപ്പം കലാപ്രവർത്തനങ്ങളും സജീവമാക്കുന്നതിൻ്റെ ഭാഗമായി ബോംബെ കേരളീയ സമാജം ആരംഭിച്ച യുവസംഗമവും സംഗീതവേദിയും മാട്ടുംഗ കേരള ഭവനം നവതി മെമ്മോറിയൽ ഹാളിൽ, സമാജം പ്രസിഡണ്ട് ഡോ: എസ്.രാജശേഖരൻ നായർ ഭദ്രദീപം കൊളുത്തി ഉദ്ഘാടനം ചെയ്തു. മുംബൈ ഡി. ജെ. സാംഘ്‌വി കോളേജ് ഓഫ് എഞ്ചിനീയറിങ്ങ് പ്രിൻസിപ്പാൽ ഡോ: ഹരിവാസുദേവൻ, പ്രശസ്ത ഗായകരായ വിജയകുമാർ (രാഗലയ), സെബാസ്റ്റ്യൻ കുരിശിങ്കൽ , മധു നമ്പ്യാർ എന്നിവരും ഉദ്ഘാടന ചടങ്ങിൽ സന്നിഹിതരായിരുന്നു.
സെക്രട്ടറി എ.ആർ. ദേവദാസ് സ്വാഗതവും ജോ:സെക്രട്ടറി ടി.എ.ശശി നന്ദിയും പറഞ്ഞു. ട്രഷറർ എം.വി. രവി, കലാ സാംസ്കാരിക വിഭാഗം ഇൻ ചാർജ് ഹരികുമാർ കുറുപ്പ് എന്നിവർ ആശംസ നേർന്നു. പരിപാടിയിൽ പങ്കെടുത്ത യുവാക്കൾക്കായി ഡോ: ഹരിവാസുദേവൻ ബോധവൽക്കരണ ക്ലാസ്സ് നടത്തി. പുതുതായി സംഗീതവേദിയിലേക്ക് രജിസ്ട്രർ ചെയ്തവരുൾപ്പെടെ വിജയകുമാർ, സെബാസ്റ്റ്യൻ, മധു നമ്പ്യാർ, ശ്യാം, വത്സരാജ്, കൊച്ചുരാജ്, വിദ്യ, റീമ, വാമിക, സ്വാതി എന്നിവർ ഗാനങ്ങൾ അവതരിപ്പിച്ചു.
