രണ്ടു മലയാളികളുടെ വധശിക്ഷ നടപ്പാക്കിയതായി യു എ ഇ
അബുദാബി :രണ്ടു മലയാളികളുടെ വധശിക്ഷ നടപ്പാക്കിയതായി യു എ ഇ – ഇന്ത്യൻ വിദേശകാര്യമന്ത്രാലയത്തെ അറിയിച്ചു. മുഹമ്മദ് റിനാഷ് അരംഗിലോട്ട്, മുരളീധരൻ പെരുംതട്ട വളപ്പിൽ എന്നിവരെയാണ് ശിക്ഷിച്ചത്. ഫെബ്രുവരി 28ന് ആണ് യുഎഇ അധികൃതർ ഇന്ത്യൻ എംബസിയെ ഇക്കാര്യം അറിയിച്ചത്. കൊലക്കുറ്റത്തിന് യുഎഇയിൽ ഇരുവരെയും വധശിക്ഷ വിധിച്ചത്.
യുഎഇ സർക്കാരിന് ദയാഹർജികളും മാപ്പ് അപേക്ഷകളും അയയ്ക്കുന്നത് ഉൾപ്പെടെ സാധ്യമായ എല്ലാ നിയമ സഹായങ്ങളും എംബസി നൽകിയതായും വിദേശകാര്യ മന്ത്രാലയം അറിയിച്ചു. യുഎഇയിലെ പരമോന്നത കോടതി ഇവരുടെ വധശിക്ഷ ശരിവെച്ച പശ്ചാത്തലത്തിലാണ് വധശിക്ഷ നടപ്പാക്കിയതെന്നാണ് അധികൃതർ അറിയിച്ചിരിക്കുതന്നത്.
വിവരം ഇവരുടെ കുടുംബത്തെ അറിയിച്ചെന്നും സംസ്കാരത്തിൽ പങ്കെടുക്കാൻ സൗകര്യം ഒരുക്കാൻ ശ്രമിക്കുകയാണെന്നും കേന്ദ്രം അറിയിച്ചു. രണ്ട് പേരെയും കൊലപാതക കുറ്റത്തിനാണ് വധ ശിക്ഷയ്ക്ക് വിധിച്ചത്. യുഎഇ പൗരനെ വധിച്ചെന്നായിരുന്നു മുഹമ്മദ് റിനാഷിനെതിരെയാണ് കേസ്. മുരളീധരൻ ഇന്ത്യൻ പൗരനെ വധിച്ചതിനാണ് വിചാരണ നേരിട്ടത്.
