ട്രംപിൻ്റെ താരീഫ് പ്രഖ്യാപനത്തില്‍ തകര്‍ന്നടിഞ്ഞ് ഓഹരി വിപണി
വാഷിങ്‌ടണ്‍: തങ്ങള്‍ അഭിവൃദ്ധി പ്രാപിക്കാന്‍ പോകുകയാണെന്ന് അമേരിക്കന്‍ പ്രസിഡന്‍റ് ഡൊണാള്‍ഡ് ട്രംപ്. പകരച്ചുങ്കം പ്രഖ്യാപനത്തിന് പിന്നാലെയാണ് ലോകരാജ്യങ്ങളെ ഞെട്ടിക്കുന്ന പ്രഖ്യാപനവുമായി ട്രംപ് എത്തിയത്. പകരച്ചുങ്കം പ്രഖ്യാപനത്തിന് പിന്നാലെ ഓഹരി വിപണി കുത്തനെ ഇടിഞ്ഞിരുന്നു. ഇതോടെയാണ് പുതിയ പ്രഖ്യാപനവുമായി ട്രംപ് എത്തിയത്.
രാജ്യത്തിന്‍റെ ഭാവിയെ കുറിച്ച് തനിക്ക് ശുഭാപ്‌തി വിശ്വാസമുണ്ടെന്നും ട്രംപ് പറഞ്ഞു. പകരച്ചുങ്കം പ്രഖ്യാപനത്തിന് പിന്നാലെ ഓഹരി വിപണി 1600 പോയിന്‍റിലധികം ഇടിഞ്ഞിരുന്നു. കൊവിഡ് കാലത്തിന് ശേഷം ഇതാദ്യമായാണ് യുഎസ് ഇത്രയും വലിയ തകര്‍ച്ചയെ അഭിമുഖീകരിക്കുന്നത്.
എന്നാല്‍ ഓഹരി തകര്‍ച്ചയുണ്ടായപ്പോഴും വിപണി കുതിച്ചുയരാന്‍ പോകുന്നുവെന്നാണ് ട്രംപിന്‍റെ മറുപടി. വിപണികളും ഓഹരികളും കുതിച്ചുയരാന്‍ പോകുന്നു, രാജ്യം കുതിച്ചുയരുമെന്നും അദ്ദേഹം രാജ്യാന്തര മാധ്യമങ്ങളോട് പറഞ്ഞു. കാര്യങ്ങളെല്ലാം വളരെ നന്നായി പോകുന്നുവെന്നാണ് തനിക്ക് തോന്നുന്നത്. ശസ്‌ത്രക്രിയ ആവശ്യമുള്ള രോഗിയെ പോലെയായിരുന്നു യുഎസ്. ഇപ്പോള്‍ തങ്ങള്‍ ആ വലിയ കാര്യം നടപ്പാക്കി. ഇതിങ്ങനെയായിരിക്കും നടപ്പാക്കുകയെന്നും ട്രംപ് പറഞ്ഞു.
ഉയര്‍ന്ന താരിഫ് ഒഴിവാക്കാന്‍ യുഎസില്‍ തങ്ങളുടെ ഉത്‌പന്നങ്ങള്‍ നിര്‍മ്മിക്കാന്‍ ആഗ്രഹിക്കുന്ന കമ്പനികളെയും അദ്ദേഹം സ്വാഗതം ചെയ്‌തു. രാജ്യത്തേക്ക് ട്രില്യണ്‍ കണക്കിന് ഡോളര്‍ നിക്ഷേപം എത്തുമെന്നാണ് പകരച്ചുങ്കം പ്രഖ്യാപനത്തിന് പിന്നാലെ ട്രംപ് പറഞ്ഞിരുന്നത്.
