“നന്മയുടെ പ്രകാശ ഗോപുരമാണ് പിജെ ജോസഫ് ” : ഗോവ ഗവർണർ പിഎസ് ശ്രീധരൻപിള്ള
കോട്ടയം: ശതാഭിഷിക്തനായ കേരള കോണ്‍ഗ്രസ് നേതാവ് പിജെ ജോസഫിന് കോട്ടയം പൗരാവലി നൽകിയ സ്വീകരണ ചടങ്ങിൽ വിവിധ രാഷ്‌ട്രീയ പാര്‍ട്ടികളിലെ മുതിര്‍ന്ന നേതാക്കള്‍ പങ്കെടുത്തു. ഗോവ ഗവർണർ ഡോ. പിഎസ് ശ്രീധരൻപിള്ളയും സിപിഎം നേതാവ് വൈക്കം വിശ്വനും അടക്കമുള്ളവരാണ് സ്വീകരണ ചടങ്ങിന്‍റെ ഭാഗമായത്.
നന്മയുടെ പ്രകാശ ഗോപുരമാണ് പിജെ ജോസഫ് എന്ന് പിഎസ് ശ്രീധരൻപിള്ള ഉദ്ഘാടന പ്രസംഗത്തിൽ പറഞ്ഞു. എതിരാളികളോടുപോലും സ്‌നേഹത്തോടെയേ പിജെ ജോസഫ് പെരുമാറിയിട്ടൂള്ളൂ. അദ്ദേഹത്തിന്‍റെ എളിമയുടെ തെളിമ നോക്കിയാണ് എല്ലാവരും ഇഷ്‌ടപ്പെടുന്നത്. രാഷ്ട്രീയത്തിന്‍റെ നിറം നോക്കിയല്ല. എളിമ കൂടുംതോറും തെളിമ കൂടുമെന്നും ശ്രീധരൻപിള്ള പറഞ്ഞു.ആരോടും വിദ്വേഷമില്ലാതെ പെരുമാറാൻ തന്‍റെ രാഷ്ട്രീയജീവിതത്തിൽ കഴിഞ്ഞു എന്ന് പിജെ ജോസഫ് ഓർമിപ്പിച്ചു. ഒരു നല്ല കാര്യമെങ്കിലും ഒരു ദിവസം ചെയ്യണമെന്നതാണ് തന്‍റെ ചിന്ത. ഒരു കുറ്റവാളിയെ രക്ഷിക്കാനും നിരപരാധിയെ കേസിൽ കുടുക്കാനും ഒരു പൊലീസ് ഓഫിസറോടും തനിക്ക് ആവശ്യപ്പെടേണ്ടി വന്നിട്ടില്ലെന്നും അദ്ദേഹം പറഞ്ഞു. പിതാവിന്‍റെ കാലം മുതൽ പിജെ ജോസഫുമായുണ്ടായിരുന്ന ആത്മബന്ധമാണ് ഗവ. ചീഫ് വിപ്പ് ഡോ എൻ ജയരാജ് ഓർമിച്ചത്.
