12, സർവീസുകൾ, 29 സ്റ്റോപ്പ്: കേരളത്തിലേക്ക് പുതിയ രണ്ട് സ്പെഷ്യൽ ട്രെയിനുകൾ
കൊച്ചി: ശബരിമല സീസണിലെ യാത്രക്കാരുടെ തിരക്ക് പരിഗണിച്ച് കേരളത്തിലേക്ക് രണ്ട് സ്പെഷ്യൽ ട്രെയിനുകൾകൂടി പ്രഖ്യാപിച്ച് സൗത്ത് സെൻട്രൽ റെയിൽവേ. ഹൈദരാബാദ് മൗല അലി സ്റ്റേഷനിൽ നിന്ന് കൊല്ലത്തേക്കാണ് രണ്ട് ട്രെയിനുകൾ സർവീസ് നടത്തുക. ഇരുദിശകളിലേക്കുമായി 12 സർവീസുകൾ ഷെഡ്യൂൾ ചെയ്തിരിക്കുന്ന ട്രെയിനിന് ആകെ 29 സ്റ്റോപ്പുകളാണുള്ളത്. ട്രെയിനുകളുടെ ടിക്കറ്റ് ബുക്കിങ് ആരംഭിച്ചിട്ടുണ്ട്.
07193 മൗല അലി – കൊല്ലം സ്പെഷ്യൽ ട്രെയിൻ മൗല അലി സ്റ്റേഷനിൽ നിന്ന് ഡിസംബർ 11, 18, 25 തീയതികളിൽ (ബുധനാഴ്ചകളിൽ) വൈകീട്ട് 06:55ന് പുറപ്പെട്ട് പിറ്റേന്ന് രാത്രി 11:55ന് കൊല്ലത്തെത്തും. നെല്ലൂർ, സേലം, കോയമ്പത്തൂർ വഴി വ്യാഴാഴ്ച വൈകീട്ട് 03:40നാണ് ട്രെയിൻ പാലക്കാട് എത്തുക. തുടർന്ന് 06:18 തൃശൂർ, 07:07 ആലുവ, 08:10 എറണാകുളം, 10:03 കോട്ടയം, 10:23 ചങ്ങനാശേരി, 10:35 തിരുവല്ല, 10:50 ചെങ്ങന്നൂർ, 11:15 കായംകുളം സ്റ്റേഷനുകൾ പിന്നിട്ട് രാത്രി 11:55ന് കൊല്ലത്തെത്തും.
മടക്കയാത്ര 07194 കൊല്ലം – മൗല അലി സ്പെഷ്യൽ ട്രെയിൻ ഡിസംബർ 13, 20, 27 തീയതികളിൽ (വെള്ളിയാഴ്ചകളിൽ) പുലർച്ചെ 02:30നാണ് കൊല്ലത്ത് നിന്ന് പുറപ്പെടുക. പിറ്റേന്ന് രാവിലെ 09:15ന് മൗല അലി സ്റ്റേഷനിൽ എത്തിച്ചേരും. എട്ട് എസി ത്രീ ടയർ കോച്ച്, ഒൻപത് സ്ലീപ്പർ ക്ലാസ് കോച്ച്, മൂന്ന് ചെയർ കാർ കോച്ച്, ഒരു ജനറൽ സെക്കൻഡ് ക്ലാസ് കോച്ച് എന്നിവയാണ് സ്പെഷ്യൽ ട്രെയിനിനുള്ളത്.
