പതിമൂന്നാം മലയാളോത്സവം ഡോംബിവ്‌ലിയിൽ
മുംബൈ : മലയാള ഭാഷാ പ്രചാരണ സംഘം- മുംബൈ നടത്തിവരുന്ന മലയാളോത്സവത്തിന്റെ പതിമൂന്നാം പതിപ്പിന്റെ കേന്ദ്ര തല മത്സരങ്ങൾ ഡോംബിവ്‌ലിയിൽ വെച്ച് നടക്കും .ഇതിനായുള്ള സംഘാടക സമിതി രൂപീകരണം ഡോംബിവല്ലിയിലെ മോഡൽ കോളേജിൽവെച്ചു നടന്നു. യോഗത്തിൽ സാമൂഹ്യസാംസ്‌കാരിക രംഗത്തെ പ്രമുഖർ പങ്കെടുത്തു.സംഘാടക സമിതി ചെയർമാനായി വർഗ്ഗീസ് ഡാനിയേലിനെയും കൺവീനർ ആയി പ്രശാന്ത് രാജിനേയും തെരഞ്ഞെടുത്തു. യോഗത്തിൽ മലയാളോത്സവം കൺവീനർ അനിൽ പ്രകാശ് സ്വാഗതം പറഞ്ഞു . മലയാള ഭാഷാ പ്രചാരണ സംഘം പ്രസിഡണ്ട് റീന സന്തോഷ് അധ്യക്ഷതവഹിച്ചു.മലയാളോത്സവ ചരിത്രത്തിൽ ആദ്യമായാണ് കേന്ദ്ര തല മത്സരങ്ങൾക്ക് വേദിയൊരുക്കുന്നതിന് ഒരു മേഖല മുന്നോട്ടുവരുന്നതെന്നും, കല്യാൺ-ഡോംബിവല്ലി മേഖലയുടെ പ്രവർത്തനങ്ങൾ ശ്‌ളാഘനീയമാണെന്നും റീന സന്തോഷ് അധ്യക്ഷ പ്രസംഗത്തിൽ പറഞ്ഞു .
മലയാള ഭാഷാ പ്രചാരണ സംഘത്തിന്റെ നാൾവഴികളായുള്ള പ്രവർത്തനങ്ങള്‍ ജനറൽ സെക്രട്ടറി
രാജൻ നായർ വിശദീകരിച്ചു. മഹാനഗരത്തിലെ പുതുതലമുറയും, പഴയ തലമുറയും ഒരേ മനസ്സോടെ
പങ്കാളികളാകുന്ന ഏറ്റവും വലിയ ജനകീയോത്സവമായിമലയാളോത്സവം മാറിക്കഴിഞ്ഞെന്നും ഇതിൻ്റെ ജനപ്രീതി വർഷംതോറും വർദ്ധിച്ചുവരുകയാണെന്നും രാജൻ നായർ അഭിപ്രായപ്പെട്ടു . മാതൃഭാഷയുടെയും, സംസ്കാരത്തിന്റെയും പേരിൽ അഭിമാനമുള്ള ഒരു സമൂഹത്തെയും, പുതുതലമുറയെയും മറുനാട്ടിൽ വളർത്തിക്കൊണ്ടുവരാൻകഴിഞ്ഞത്
സംഘത്തിന്റെ പ്രവർത്തനങ്ങൾക്കുള്ള അംഗീകാരമാണെന്നും അദ്ദേഹം പറഞ്ഞു.
കേരളീയ സമാജം ഡോംബിവല്ലി ചെയർമാൻ വർഗ്ഗീസ് ഡാനിയൽ സംഘാടക സമിതിയുടെ ഉദ്‌ഘാടനം നിർവ്വഹിച്ചു. ഭാഷയേയും കലകളെയും പ്രചരിപ്പിക്കുന്നതിന് വേണ്ടി മലയാള ഭാഷാ പ്രചാരണ സംഘം നടത്തുന്ന നിസ്വാർത്ഥ സേവനത്തെ അദ്ദേഹം അഭിനന്ദിച്ചു. ഈ മാതൃകാ പ്രവർത്തനങ്ങൾക്ക് കേരളീയ സമാജം ഡോംബിവല്ലി എല്ലാ പിന്തുണയും നല്കിവരുന്നുണ്ടെന്നും, പതിമൂന്നാം മലയാളോത്സവംവിജയിപ്പിക്കുന്നതിനുള്ള എല്ലാ സഹായ സഹകരണങ്ങളും ഉണ്ടാവുമെന്നും അദ്ദേഹം ഉറപ്പു നൽകി. തുടർപ്രവർത്തനങ്ങളുടെ ഭാഗമായിട്ടുള്ള ഉപസമിതിയുടെ രൂപീകരണവും തഥവസരത്തിൽ നടന്നു.
മലയാളോത്സവത്തിന്റെ ഭാഗമായി നടത്തുന്ന ലോഗോ -റീല്‍സ് മത്സരങ്ങളെക്കുറിച്ചും മറ്റു
പ്രവർത്തനങ്ങളെക്കുറിച്ചും യോഗത്തിൽ വിശദീകരിച്ചു. പ്രചാരണത്തിന്റെ ഭാഗമായി ആരംഭിച്ച ഇൻസ്റ്റാഗ്രാം, ഫേസ്ബുക്ക് പേജുകളുടെ ഉദ്‌ഘാടനം ആംചി മുംബൈ ഡയറക്ടറും മാധ്യമ പ്രവർത്തകനുമായ പ്രേംലാൽ നിർവ്വഹിച്ചു.
തുടർന്ന് സാമൂഹ്യ സാംസ്‌കാരിക രംഗത്തെ പ്രമുഖവ്യക്തികളും, സംഘടനാ പ്രതിനിധികളും പതിമൂന്നാം മലയാളോത്സവത്തിന് ആശംസകൾ നേർന്നുകൊണ്ട് സംസാരിച്ചു. മേഖലയിലെ കലാപ്രതിഭകൾ അവതരിപ്പിച്ച വിവിധ കലാപരിപാടികളും നടന്നു . സമിതി കൺവീനർ പ്രശാന്ത് രാജ് നന്ദി പറഞ്ഞു .
