മലയാളി ബോളിവുഡ് നർത്തകി, ശ്വേതാ വാര്യരുടെ നൃത്തം ഗുരുവായൂരിൽ
മുംബൈ : പുതു തലമുറയിലെ അറിയപ്പെടുന്ന നർത്തകിയും മുംബൈ മലയാളിയുമായ ശ്വേതാ വാരിയർ മെയ് 4 ഞായറാഴ്ച രാവിലെ 9 മണിക്ക് ഗുരുവായൂർ മേൽപ്പത്തൂർ ഓഡിറ്റോറിയത്തിൽ നൃത്തം ചെയ്യാനെത്തും . കേരളത്തിലെ കൊടുങ്ങലൂരിൽ ജനിച്ച് മുംബൈയിൽ വളർന്ന ശ്വേതാ വാരിയർ ‘സ്ട്രീറ്റ് ഓ ക്‌ളാസിക്കൽ’ എന്ന നൃത്തശൈലിയുടെ ആദ്യ ഗുരുകൂടിയാണ്.
അമ്മ അംബിക വാരസ്യാരിൽ നിന്ന് വളരെ ചെറിയ പ്രായത്തിൽ തന്നെ നൃത്തം ശാസ്ത്രീയമായി അഭ്യസിച്ചു വളർന്ന ശ്വേത ഒഡീഷയിലെ കട്ടക്കിൽ നിന്നും ‘നൃത്യശ്രേഷഠ’ , ആന്ധ്രപ്രദേശിലെ ചിലകലൂരി പെട്ടിൽ നിന്നും ‘നാട്യ മയൂരി’ പുരസ്കാരങ്ങൾ അടക്കം 15 വയസ്സിനുള്ളിൽ 20 ലധികം ദേശീയ പുരസ്കാരങ്ങൾ നേടിയിട്ടുണ്ട് .
മലയാളത്തിൽ അമൃത സൂപ്പർ ഡാൻസർ ജൂനിയർ ജൂനിയർ , മഴവിൽ മനോരമയിലെ ഡി ഫോർ ഡാൻസ് , സീ കേരളയിലെ ഡാൻസ് ഷോ എന്നിവയിലും തെലുങ്കിൽ ‘ ഇ ‘ ചാനലിൽ ധീ ഡാൻസ് ഷോയിലും ശ്വേതാ വാരിയർ പങ്കെടുത്തിട്ടുണ്ട് .
ഹിന്ദി ചാനലായ സോണി ചാനലിലെ ‘ഇന്ത്യാസ് ബേസ്റ്റ് ഡാൻസർ ‘സീസൺ 1 ലൂടെയാണ് ശ്വേതാ വാരിയർ പ്രശസ്തയാകുന്നത് . ക്‌ളാസിക്കൽ നൃത്തമായ ഭാരതനാട്യവും സ്ട്രീറ്റ് ശൈലിയായ ഹിപ്ഹോപ്പും ഇഴചേർത്ത്‌ ശ്വേത രൂപപ്പെടുത്തിയ ‘ സ്ട്രീറ്റ് ഓ ക്‌ളാസിക്കൽ ‘എന്ന നൃത്ത രീതി ഇന്ത്യയുടെ ഇന്റർനാഷണൽ നൃത്തരൂപമായാണ് അറിയപ്പെടുന്നത് .ഗോവയിലെ സെറാൻഡിപെട്ടി ഫെസ്റ്റിവലിലും , മുംബയിലെ കാലാഘോഡ ഫെസ്റ്റിവലിലും ,സംഘടകരുടെ പ്രത്യേക ക്ഷണം അനുസരിച്ചു ശ്വേതാ വാരിയർ ‘ സ്ട്രീറ്റ് ഓ ക്‌ളാസിക്കൽ ‘ നൃത്തം അവതരിപ്പിച്ചിട്ടുണ്ട് .
പൂനാ ഫിലിം ഇൻസ്റ്റിറ്റ്യൂട്ട്ലെ വിദ്യാർത്ഥികളുടെ സിനിമയായ ‘പോച്ചമ്മ ‘ യിൽ നായികയായി അഭിനയിച്ചിട്ടുണ് (2022 ) . കൊക്കകോള , സൺസിൽക്ക്, പൂമ ഷൂസ് തുടങ്ങിയ പ്രമുഖ ഉൽപ്പങ്ങളുടെ സോഷ്യൽ മീഡിയ പരസ്യങ്ങളിലും, ടി സിരീസ് , ആർട്ടിസ്റ്റ് ഫസ്റ്റ് തുടങ്ങിയ മികച്ച ബാനറുകളുടെ മ്യുസിക്‌ ആൽബങ്ങളിലും ശ്വേതാ വാരിയരുടെ നൃത്തം ട്രെൻഡിങ് ആണ് .
ഹിന്ദിയിലെ സിനിമ റിലീസിംഗ് സമയത്ത് നായികാ നായകന്മാർക്കൊപ്പം ശ്വേതാ വാരിയരുടെ നൃത്തം കൂടി ഉൾപ്പെടുത്തി സോഷ്യൽ മീഡിയ റീലുകൾ കൂടി സിനിമയുടെ അണിയറ പ്രവർത്തകർ പ്രചരിപ്പിക്കാറുണ്ട് .സിനിമകളുടെ പ്രചാരണത്തിനായി ഇൻഫ്ലുൻസർ ആയും ശ്വേതാ വാരിയർ പ്രവർത്തിക്കുന്നു .
അമിതാഭ്‌ ബച്ചൻ , ഷാരൂഖ് ഖാൻ , സൽമാൻ ഖാൻ , മിഥുൻ ചക്രവർത്തി, ടൈഗർ ഷ്‌റോഫ് തെന്നിന്ത്യൻ സൂപ്പർ താരം അല്ലു അർജുൻ, കങ്കണ റണാവത് , മാധുരി ദീക്ഷിത് , ആലിയ ഭട്ട് , ബാഹുബലി നായിക തമന്ന ഭാട്ടിയ , മീനാക്ഷി ശേഷാദ്രി എന്നിവർക്കൊപ്പവും ശ്വേതാ വാരിയർ നൃത്തം ചെയ്തിട്ടുണ്ട് . ശ്വേതാ വാര്യരുടെയും അമ്മ അംബിക വാരസ്യാരുടെയും പേരുകൾ യുനെസ്കോ അംഗീകരിച്ച ഇന്റർനാഷണൽ ഡാൻസ് ഡയറക്ടറിയിൽ ഈയിടെ ഉൾപ്പെടുത്തിയിട്ടുണ്ട്.
ഇപ്പോൾ ഹിന്ദി ചാനലുകളിൽ കൊറിയോഗ്രാഫറായി പ്രവർത്തിക്കുന്ന ശ്വേത ഇന്ത്യയിലും വിദേശത്തും
പരിശീലന ക്‌ളാസ്സുകളും നടത്തുന്നു . വിക്രം വേദ എന്ന സിനിമയിൽ ഗണേഷ് ഹെഗ്ഡെക്കൊപ്പം നൃത്ത സംവിധാന സഹായിയായി പ്രവർത്തിച്ചിട്ടുണ്ട് .
ഗുരുവായൂരിൽ ആദ്യമായാണ് ശ്വേത നൃത്തമവതരിപ്പിക്കുന്നത് . അമ്മ അംബിക വാരസ്യാർ മുംബയിൽ ട്രൂ ഇന്ത്യൻ ഡാൻസ് അക്കാദമി എന്ന പേരിൽ ഭരതനാട്യം ക്‌ളാസ്സുകൾ നടത്തുന്നു . അച്ഛൻ ചന്ദ്രശേഖരൻ ട്രാവൽ ഏജൻസി ജോലികൾ ചെയ്യുന്നു. സഹോദരൻ ശരത് വാരിയർ പൂനെ ഫിലിം ഇൻസ്റ്റിറ്റിയൂട്ടിൽ നിന്നും എഡിറ്റിംഗ് കോഴ്സ് കഴിഞ് ഡോക്യൂമെന്ററി, സിനിമ എഡിറ്റിംഗ് മേഖലയിൽ പ്രവർത്തിച്ചുവരികയാണ് . മുംബൈയിൽ ഡോംബിവ്‌ലിയിലാണ് ശ്വേതയും കുടുംബവും താമസിക്കുന്നത്.
