“വിൻസി പരാതി നൽകിയാൽ ഉടൻ നടപടി ‘; A M M A
തിരുവനന്തപുരം :സിനിമാ ചിത്രീകരണത്തിനിടയിൽ ലഹരി ഉപയോഗിച്ച നടനിൽ നിന്ന് മോശം അനുഭവമുണ്ടായെന്ന നടി വിൻസി അലോഷ്യസിന്റെ വെളിപ്പെടുത്തലിന് പ്രതികരണവുമായി അഭിനേതാക്കളുടെ സംഘടന ‘അമ്മ’ രംഗത്തെത്തി.
വിൻസി ഔദ്യോഗികമായി സംഘടനയ്ക്ക് പരാതി നൽകിയിട്ടില്ല. ലഭിച്ചാൽ ഉടൻ നടപടിയുണ്ടാകുമെന്ന് സംഘടന മാധ്യമങ്ങളെ അറിയിച്ചു.വിൻസി ഉന്നയിച്ച കാര്യങ്ങളിൽ പൂർണ പിന്തുണയെമന്നും ‘അമ്മ ‘യുടെ പ്രതിനിധികൾ പറഞ്ഞു . ലഹരിക്കെതിരെ ശക്തമായ നിലപാട് സ്വീകരിക്കുമെന്നും സംഘടന അറിയിച്ചു.
സിനിമ ചിത്രീകരണത്തിനിടെ ലഹരി ഉപയോഗിച്ച നടൻ തന്നോട് മോശമായി പെരുമാറിയെന്നായിരുന്നു വിൻസിയുടെ വെളിപ്പെടുത്തൽ. ലഹരി ഉപയോഗിക്കുന്നവർക്കൊപ്പം ഇനി അഭിനയിക്കില്ലെന്ന് നടി വ്യക്തമാക്കുകയും ചെയ്തിരുന്നു.നടൻ, സിനിമാസെറ്റിൽ സ്ഥിരമായി ലഹരി ഉപയോഗിക്കുന്ന വ്യക്തിയാണെന്നും സിനിമ പൂർത്തിയാക്കിയത് സഹപ്രവർത്തകരുടെ അഭ്യർത്ഥന പ്രകാരമായിരുന്നെന്നും വിൻസി പറഞ്ഞു. ഇൻസ്റ്റഗ്രാമിൽ പങ്കുവച്ച വീഡിയോയിലായിരുന്നു നടി വെളിപ്പെടുത്തൽ നടത്തിയത്. എന്നാൽ നടന്റെ പേര് പരാമർശിച്ചിട്ടില്ല. അതേസമയം വിൻസി പരാതിയുമായി മുന്നോട്ടുപോവുകയാണെങ്കിൽ പിന്തുണ നൽകുമെന്ന് നടിമാരുടെ സംഘടന ‘ഡബ്ല്യുസിസി’ വ്യക്തമാക്കി.
അതിനിടയിൽ വിൻസിയുടെ വെളിപ്പെടുത്തലിൽ നടപടിയെടുക്കാൻ എക്സൈസും പോലീസും ഒരുങ്ങുകയാണ്.
