അനധികൃത കുടിയേറ്റം :അമേരിക്കയിൽ നിന്നും 119 പേർ അമൃത്സറിലേക്ക്‌
വാഷിംഗ്‌ടൺ :അമേരിക്കയിലെ നിയമവിരുദ്ധരായി കഴിയുന്ന അനധികൃത ഇന്ത്യൻ കുടിയേറ്റക്കാരുമായുള്ള രണ്ടാമത്തെ വിമാനം ഇന്ന് അർദ്ധരാത്രിയോടെ അമൃത്സറിൽഎത്തും . 119 കുടിയേറ്റക്കാരുമായുള്ള രണ്ടാമത്തെവിമാനം ഇന്ന് രാത്രി 12 മണിക്ക് അമൃത്സറിലെ ശ്രീ ഗുരു റാം ദാസ് ജീ അന്താരാഷ്ട്ര വിമാനത്താവളത്തിൽ എത്തുമെന്നാണ് റിപ്പോർട്ടുകൾ.
119 കുടിയേറ്റക്കാരിൽ 67 പേർ പഞ്ചാബിൽ നിന്നും 33 പേർ ഹരിയാനയിൽ നിന്നും ഉള്ളവരാണ്.. ഗുജറാത്ത്, ഉത്തർപ്രദേശ്,മഹാരാഷ്ട്ര,ഗോവ,രാജസ്ഥാൻ, ഹിമാചൽ പ്രദേശ്, ജമ്മു കാശ്മീർ എന്നീ സംസ്ഥാനങ്ങളിൽ നിന്നുള്ളവരും സംഘത്തിലുണ്ട്. ഇതുമായി ബന്ധപ്പെട്ട് വിമാനത്താവളത്തിൽ പ്രത്യേക സുരക്ഷ ഏർപ്പെടുത്തിയിട്ടുണ്ട്.
ഇമിഗ്രേഷൻ ഉദ്യോഗസ്ഥർ വിദേശകാര്യമന്ത്രാലയത്തിലെ ഉദ്യോഗസ്ഥർ എന്നിവരും വിമാനത്താവളത്തിൽ കാണും. കുടിയേറ്റക്കാരുമായുള്ള മൂന്നാമത്തെ വിമാനം ഞായറാഴ്ച എത്തുമെന്നും റിപ്പോർട്ടുകളുണ്ട്. കഴിഞ്ഞ തവണ 104 ഇന്ത്യക്കാരെ, അമേരിക്ക സൈനിക വിമാനത്തിൽ വിലങ്ങണിയിച്ച് എത്തിച്ചതിൽ വ്യാപക പ്രതിഷേധം ഉയർന്നിരുന്നു. പിന്നാലെ ഇന്ത്യ ആശങ്ക അറിയിച്ചു. പ്രധാനമന്ത്രി നരേന്ദ്രമോദിയും യുഎസ് പ്രസിഡന്റ് ഡൊണാൾഡ് ട്രംപും തമ്മിലുള്ള കൂടിക്കാഴ്ചയിൽ അനധികൃതകുടിയേറ്റക്കാരെ ഇന്ത്യയിലെത്തിക്കുന്നതിന് അമേരിക്കക്ക് എല്ലാ പിന്തുണയും ഇന്ത്യൻ പ്രധാനമന്ത്രി വാഗ്‌ദാനം ചെയ്തിട്ടുണ്ട്.
