അജ്ഞാത സംഭാവനകളിൽ ഷിർദി ട്രസ്റ്റിന് നികുതി ഇളവിന് അർഹത: ഹൈക്കോടതി
മുംബൈ: അജ്ഞാതർ നൽകുന്ന സംഭാവനകളിൽ ഷിർദി ട്രസ്റ്റിന് നികുതി ഇളവിന് അർഹത ഉണ്ടെന്ന ട്രൈബ്യൂണലിന്റെ കണ്ടെത്തൽ ബോംബെ ഹൈക്കോടതി ശരിവെച്ചു.
ഷിർദിയിലെ ശ്രീ സായി ബാബ സൻസ്ഥാൻ ട്രസ്റ്റ് ഒരു ജീവകാരുണ്യവും മതപരവുമായ സംഘടനയായതിനാൽ അജ്ഞാതരിൽ നിന്ന് ലഭിക്കുന്ന സംഭാവനകൾക്ക് ആദായനികുതിയിൽ നിന്ന് ഇളവ് ലഭിക്കാൻ അർഹതയുണ്ടെന്ന ആദായനികുതി അപ്പലേറ്റ് ട്രിബ്യൂണലിൻ്റെ (ഐടിഎടി) ഉത്തരവ് ബോംബെ ഹൈക്കോടതി ചൊവ്വാഴ്ച ശരിവച്ചു. ഇതോടെ ഐടിഎടിയുടെ ഉത്തരവിനെതിരെ ആദായനികുതി വകുപ്പ് നൽകിയ അപ്പീൽ ഹൈക്കോടതി തള്ളി.
സായി ബാബ ട്രസ്റ്റിൻ്റെ ‘ഹുണ്ടി’ (ഭണ്ടാരം )യിൽ ലഭിക്കുന്ന ഗണ്യമായ അജ്ഞാത സംഭാവനകൾക്ക് ആദായനികുതി (ഐ-ടി) നിയമത്തിലെ സെക്ഷൻ 115 ബിബിസി (1) പ്രകാരം നികുതി നൽകേണ്ടതില്ലെന്ന് ഹൈക്കോടതി വ്യക്തമാക്കി.
ഐടിഎടിയുടെ 2023 ഒക്ടോബർ 25ലെ തീരുമാനത്തെ ചോദ്യം ചെയ്ത് മുംബൈയിലെ ആദായനികുതി (ഒഴിവാക്കൽ) കമ്മീഷണർ നൽകിയ അപ്പീൽ ജസ്റ്റിസുമാരായ ഗിരീഷ് എസ് കുൽക്കർണി, സോംശേഖർ സുന്ദരേശൻ എന്നിവരടങ്ങിയ ഡിവിഷൻ ബെഞ്ച് നിരസിച്ചു. വാദം കേൾക്കൽ അവസാനിപ്പിച്ച് ഈ വർഷം ജൂലൈ 24ന് വിധി പറയാൻ മാറ്റി വെച്ചിരുന്നു.
2019 വരെ ട്രസ്റ്റിന് മൊത്തം 400 കോടി രൂപ സംഭാവന ലഭിച്ചതായി ഐ-ടി വകുപ്പ് വാദിച്ചു. എന്നാൽ മതപരമായ ആവശ്യങ്ങൾക്കായി 2.3 കോടി രൂപ മാത്രമാണ് ചെലവഴിച്ചത്, പ്രധാന ചെലവുകൾ വിദ്യാഭ്യാസ സ്ഥാപനങ്ങൾ, ആശുപത്രികൾ, മെഡിക്കൽ സൗകര്യങ്ങൾ എന്നിവയ്ക്കായിരുന്നു.
ഇത് കാണിക്കുന്നത്, ട്രസ്റ്റ് ഒരു ജീവകാരുണ്യ സ്ഥാപനം മാത്രമാണെന്നും ഒരു മത സംഘടനയല്ലെന്നും, അതേസമയം ഭക്തരുടെ വിശ്വാസം കാരണം മാത്രമാണ് സംഭാവനകൾ സ്വീകരിക്കുന്നതെന്ന് വകുപ്പ് വാദിച്ചു. 2015 നും 2019 നും ഇടയിൽ ട്രസ്റ്റിന് അജ്ഞാത സംഭാവനയായി വൻ തുക ലഭിച്ചിട്ടുണ്ടെന്നും അത് നികുതിയിൽ നിന്ന് ഒഴിവാക്കാനാകില്ലെന്നും ഐടി ഡിപ്പാർട്ട്‌മെൻ്റ് അസസ്സിംഗ് ഓഫീസറുടെ അഭിപ്രായത്തിൽ പറഞ്ഞിരുന്നു.
